25. sept. 2008
Í dag var haldin á Þúfnavöllum, hrútasýning á veturgömlum hrútum í Sauðfjárræktarfélagi Skriðuhrepps.
Á sýningarstað var mætt með 21 hrút, en fyrr í dag voru Búðarnesshrútarnir dæmdir þar heima 5 að tölu þannig að alls voru skoðaðir 26 hrútar í félaginu.
Dvergur 07-270, var dæmdur besti hrútur sýningarinnar með 86,5 stig.
F: Krókur 05-150. M: Biða 04-472
Dvergur er í eigu Guðmundar og Sigrúnar á Staðarbakka.
Börkur 07-175 varð í öðru sæti með 85 stig.
F: Krókur 05-150. M: Eik 03-342
Börkur er í eigu Sigurðar og Margrétar á Staðarbakka.
Eitill 07-444 varð í þriðja sæti með 85 stig.
F: Fótur 04-423. M: 04-065
Eitill er í eigu Sturlu og Guðleifar á Þúfnavöllum
Gammur 07-443 varð í fjórða sæti einnig með 85 stig.
F: Ljúfur 05-968. Gammur er keyptur lambið frá Hjarðarfelli.
Hann er í eigu Sturlu og Guðleifar á Þúfnavöllum.
1. september 2008
Í gærkveldi kom stjórn Sauðfjárræktarfélags Skriðuhrepps saman til fundar á Staðarbakka. Þar skipti stjórnin með sér verkum þannig, að Guðmundur Sturluson er áfram formaður og Guðmundur Skúlason ritari eins og var, en Viðar Þorsteinsson, sem kom inn í stjórnina á síðasta aðalfundi í stað Gunnars Gunnarssonar, tekur nú við starfi gjaldkera. Ýmislegt fleira var gert á fundinum t.d. var ákveðið að félagið héldi í haust hrútasýningu fyrir veturgamla hrúta, líkt og undanfarin haust. Sýningin verður á Þúfnavöllum, trúlega um eða upp úr mánaðarmótunum september og október. Fundargerð fundarins má sjá hér á heimasíðunni, undir fundargerðir > stjórnarfundir.
27. mars 2008
Annað kvöld, föstudagskvöldið 28. mars kl. 20:30 ætla félagar í Sauðfjárræktarfélagi Skriðuhrepps að koma saman á Staðarbakka og spila "Hrútaspilið". Þetta verður með sniði félagsvistar, þar sem spilaðar verða 20 umferðir og gengur út á að safna sem flestum hrútum í heildina. Sá sem rakar að sér flestum hrútum á kvöldinu verður útnefndur Hrútakóngur eða Hrútadrottning kvöldsins og fær vegleg verðlaun fyrir sinn árangur í þessari hrútasmalamennsku á spilaborðinu, einnig verða veitt 1. og 2. verðlaun. Þá verða veitt verðlaun fyrir þann sem tekst að krækja sér í flesta hrúta í einu spili. Samkoma þessi er ætluð fyrir félagsmenn og fjölskyldur þeirra.
17. mars 2008
Í dag var aðalfundur félagsins haldinn að Auðnum II í Öxnadal.
Ágæt mæting var á fundinn, en hann sátu alls 21 félagi og gestir.
Ólafur G Vagnsson ráðunautur fór yfir niðurstöður skýrsluhalds síðasta árs og lambhrútaskoðun á síðasta hausti. Afhenti hann svo farandbikar félagsins sem veittur er árlega fyrir hæst stigaða lambhrút í félaginu. Að þessu sinni hlutu hann Guðmundur og Sigrún á Staðarbakka, fyrir lambhrút nr. 678 sem stigaðist upp á 88 stig.
Sigurður Þór Guðmundsson flutti fróðlegt erindi um ýmiss konar aðstöðu og vinnuhagræðingu á sauðfjárbúum.
Sú breyting varð á stjórn félagsins á fundinum, að Gunnar Gunnarsson í Búðarnesi gaf ekki kost á sér til endurkjörs og var Viðar Þorsteinsson í Brakanda kosinn í hans stað.
Fundarfólk þáði á fundinum frábærar veitingar hjá Erlu Halldórsdóttur á Auðnum og börnum hennar. Erla hefur nú hætt búskap og voru henni færð blóm frá félaginu í fundarlok í þakklætisskyni nú þegar hún hættir í félaginu.
Á næstunni koma inn á heimasíðuna gleggri upplýsingar um það sem gerðist á fundinum, svo sem fundargerð og skýrslur.
Fleiri myndir frá deginum má sjá hér.
7. mars 2008
Í kvöld var stjórnarfundur í Sauðfjárræktarfélagi Skriðuhrepps, haldinn á Þúfnavöllum.
Þar var ákveðið að aðalfundur félagsins verði haldinn mánudaginn 17. mars nk. að Auðnum 2 kl. 13:30. Að venju mun Ólafur G Vagnsson ráðunautur mæta á fundinn og fara yfir niðurstöður úr skýrsluhaldi síðasta árs o.fl. er varðar félagsstarfið.
Þá var ákveðið að kanna möguleika á að halda spilakvöld, þar sem félagar og fjölskyldur þeirra kæmu saman og spiluðu Hrútaspilið, líkt og gert var í fyrra vetur þann 1. apríl og þótti þá takast með ágætum.